Gen 14 | LID | STEP | Na len kabin Amrapel badu Babilon, Ariyok badu Elasar, Sedola-oma badu Ilam ma Tidal badu Go-im,

Genesis 14

Abram Sebenei Lot

1 Na len kabin Amrapel badu Babilon, Ariyok badu Elasar, Sedola-oma badu Ilam ma Tidal badu Go-im, 2 oro badeh ala amwekes bahun i ta kabin ma limeh: oro kabin doh badeh, Bera badu Sodom, Birsa badu Gomora, Sinah badu Admah, Semeber badu Sebo-im ma hawe kabin badu Bela (So-ar). 3 Ya oro kabin ma limeh doh badeh atukum ase ma lau ta bahun badeh ado nyamak Sidim, na dah badeh aloh gwa ndras nyakadan. 4 Oro badeh mene are baha tondrok ta Sedola-oma winiya jaha ronoh la-uh arile na jaha ronoh taloh badeh oro bwale oro ta are bahan. 5 Na jaha ronoh hahuw badeh Sedola-oma hawe iri kabin ta seben tan badeh, ame ma lau ta bahun tiri, ame andrei iri Repa-im an Asterot Karna-im, ma Susim an Ham, iri Emim ado loboho munyak ta Kiriyata-im, 6 ma hawe iri Hora ado mandrei Idom, tikahei iri ala Elparan loboho ka-u lomale an (kon ndra an le). 7 Ano oro tubuni oro, ano oro ame Kades (aloh Enmispat). Oro andrei munyak mari tiri Amaleka ma andrei Amora kon oro manyah ado Hasason Tamar.

8 Ano iri kabin badu Sodom, badu Gomora, badu Admah, badu Sebo-im ma Bela tukumwi iri lau ta bahun tiri, ma amwekes bahun ado nyamak Sidim, amwekes bahun, hawe iri kabin badu Ilam, badu Go-im badu Babilon hawe Elasar. Kabin limeh amwekes bahun i la-u kabin hahuw. 10 Eme nyamak doh badeh lawes udu aliy eme ya iri kabin badu Sodom hawe Gomora anya katobwak ta bahun eme badeh iri taku a bolo lawes amwekes na lakou sabata-an nane dah, eme ya oro kabin taloh le badeh taku akoh a mandrei. 11 Eme oro kabin ma hahuw dah andrei lakou mari badu Sodom hawe Gomora, ma nyamon ale ma oro au. 12 Ya Lot nadu nadu tine Abram badeh oro ado Sodom, eme badeh iri andrei oro ma lakou toro mari.

Abram Ili Akohok Lot Oro

13 Eme ndramak ari ta atobwak eme badeh tiye nyala Abram ta lakou mari. Abram badeh Hiburu. Iy manyah udu mirihik ta kei ta aton ta Mamre badu Amora. Mamre hawe nadu tinen Eskol ma Aner badeh, oro lau ta seben Abram. 14 Eme Abram anuhun iri badeh ndrakuhi Lot oro. Eme iy nyuruwini iri lau ta bahun tan badeh ame, iri mari a se badeh asahan tonek ronoh ndru la-uh (318). Eme iri tikahei iri badeh ala asos Dan. 15 Ano iy apwai lau ta bahun tan, ano na ben badeh iri ala amwekes bahun tikahei iri ala asos Hobah loboho Damaskus. 16 Eme iy kuhi lakou mari mene andrei eme hamon. Ma hawe lowan Lot hawe lakou tan mari ma hawe iri badih ma hawe lau rayah ta bolo kou.

Melsisedek Edeu Nyosowan I Ta Abram

17 Ano len Abram eme hamon ta bahun ta i la-u Sedola-oma ma hawe iri kabin badeh, eme badeh kabin badu Sodom ili aturuk iy udu nyamak Sabeh (aloh Nyamak ta kabin). 18 Eme kabin Melsisedek, kabin badu Salem, lau ta ndrokowa lau hawe Kindrei ta Kindrei badu loken, eme atiye jabi hawe wa-in i na Abram. 19 Eme iy atehei nyosowan i tan, ano iy anya, “Ya abo, Kindrei badu loken, ou ta amwekes munyak ma kandrah, ou nyosowani Abram! 20 Kindrei badu loken atehei boto-on i tam ta bahun, ya masiye badeh ki ta Kindrei!”

Eme badeh Abram eme atehei lakou tan rayah, i buku ronoh, iy atehei ari i tan ya i buku rinek, ronoh i tan, lakou doh iy andrei ta bahun eme badeh atehei i ta Melsisedek.

21 Ano kabin ta Sodom tiye i ta Abram, “Lakou tam mari kudu gwek, jo aseken le lau tek.”

22 Eme Abram anya eh, “Jo badeh tandrakan ta mada Laban Kindrei badu loken, ndramak ta amwekes munyak ma kandrah, ta jo winiyan basolo-ei ari lakou tam bwe, i buku none saba lakou nadu bwisik i buku kam hawe ku-i katim. Bakameh hamon ou asehek, ‘Jo le badeh jo mwesekei Abram tan lakou solo-an.’ 24 Jo kameh winiyan basolo-ei ari lakou bwe. Jo aseken lakou le iri lau tek mene andrei ma ndraniy badeh keme ai. Arile Aner, Eskol hawe Mamre, oro lau ta aseben jo badeh kakohok ki toro ai.”